Yoldan keçən insanları tərifləyib, aya 3 min qazanır

Yaponiyada bir kişi borca ​​görə evini itirib. Bundan sonra o,  küçələrdə yaşamağa başlayıb. Çox keçmədən kişi pul qazanmağın rahat yolunu da tapıb.

Xeberlent.az xəbər verir ki, bu barədə "South China Morning Post" qəzeti yazır.

Belə ki, 43 yaşlı yapon yoldan keçən insanları tərifləyərək pul qazanmağa başlayıb. Yaponlar tərəfindən "Tərifləyən dayı" kimi tanınan kişi qəzetə danışıb:

"Gənc yaşlarımda qumara maraq göstərdiyim üçün yetkin həyatımın çox hissəsini borcla keçirmişəm. Atam buna görə insult keçirtdi və evin ipotekasını ödəyə bilmədi. Borclar səbəbindən evsiz qaldım  2021-ci ildən küçədə yaşamağa başladım". 

Məlumata görə, kişi qatar stansiyalarına və izdihamlı küçələrə “Mən Sizi tərifləyəcəyəm” yazılmış karton lövhə ilə gəlir. Kiçik ianələr üçün insanlarla ünsiyyət qurur, onlara komplimentlər deyir. Orta hesabla yapon gündə təxminən 10 min yen (109 AZN), yəni ayda təxminən 300 min yen (3282 AZN) qazanır. O, gündə 30-dan çox insanı tərifləyir. Yapon, həmçinin hədiyyələr - şokoladlar, qəlyanaltılar, içkilər və təşəkkür qeydləri alır.

Kişinin həyat tərzi maraqla qarşılanıb.