Ançelotti "Real"dan getməyə hazırlaşır

"Real Madrid"in baş məşqçisi Karlo Ançelotti cari mövsüm başa çatdıqdan sonra komandanı tərk etmək qərarına gəlib.

Xeberlent.az xarici mediaya istinadən xəbər verir ki, bu barədə baş məşqçiyə yaxın mənbə bildirib. 

Mənbənin sözlərinə görə, mütəxəssisin postunu tərk etməsinə “Real Madrid”in cari mövsümdə qazandığı kubokların sayı heç bir şəkildə təsir etməyəcək. Mütəxəssisin hazırkı müqaviləsi 2026-cı ilə qədərdir, lakin o, müqaviləni bir il əvvəl ləğv etmək niyyətindədir.

Ançelottinin "Real"da əvəzləyicisi hazırda Almaniyanın "Bayer" klubuna başçılıq edən Xabi Alonso ola bilər. İspaniyalı mütəxəssis 2009-2014-cü illərdə beş il Madrid klubunda çıxış edib.

Ançelotti 2021-ci ildən "Real Madrid"i çalışdırır. O, 2013-2015-ci illərdə də komanda ilə çalışıb. Komanda ilə birlikdə məşqçi iki dəfə İspaniya çempionu olub, ölkə kubokunun və Superkubokunun sahibi olub, həmçinin üç dəfə Çempionlar Liqasının kubokunu qazanıb.